EGITASMOA

BOST HILABETE JADA

Bost hilabete jada Agurainen 75 ordu euskaraz martxan hasi zenetik

Jada badira bost hilabete Agurainen 75 ordu euskaraz ekimena martxan jarri zenetik, Agurainen euskaraz bizitzeko hautua egin dutenen kanpaina hain zuzen ere. Ordutik hainbat ekintza eraman dira aurrera ekimena ezagutzera eman ahal izateko.

Euskaraz bizitzeko erabakia hartu duten hainbat aguraindar martxoaz geroztik elkartzen hasi eta maiatzean aurkeztu zen jende aurrean ekimena. Ez da jai bai, ezta ekintzaz beteriko egun bat ere; euskara eguneroko arlo guztietara eramateko ekimena da, edonon eta edonorekin euskaraz. Halaxe aurkeztu zen udaberrian eginiko ekitaldian.

Harrezkeroztik hainbat zita izan dituzte Aguraingo euskaldunek; hitzaldiak, euskaraz edonon eta edonorekin eroso sentitzeko TELP tailerra, ostiralero pintxo potea, kontzertuak, irakurketa musikatua… guztiak pixkanaka pixkanaka herrian presentzia lortu eta Agurain prestatzen joateko. Horixe izan baita hilabete hauetako helburuetako bat, herria euskaraz bizi nahi duten guzti horiek eroso senti daitezen prestatzea.

Eginiko lan horrek bere emaitzak eman ditu, eta 200 lagunek sinatu dute dagoeneko azaroaren 8, 9, 10 eta 11an euskaraz edonon eta edonorekin egiteko konpromezua. Horrekin batera herriko 80 kolektibo eta negoziok egun horietan euskararen erabilera erraztuko dutela bermatu dute. Mapa bat osatu da informazio guzti horrekin, herrian jakin dadin nork egin duen ekimenarekin bat.

Abuztua iristearekin batera oporrak ere iritsi dira leku gehienetara, eta baita hona ere. Hilabeteko geldialdia izango du kanpainak eta irailean bueltatuko da berriz indarberriturik.

Udazkenean izango du ekimenak azken txanpa eta ordurako ekintza gehiago, taller gehiago, musika… pentsaturik daude dagoeneko. Herria prestatzen eta aktibatzen jarraitzeko gomendioak aurkeztuko dira, bai euskaldunentzat eta baita erdaldunentzat ere. Euskaldunek euren burua aktibatu dezaten euskaraz egin ahal izateko eta erdaldunek jakin dezaten euskaraz bizi nahi duenari bidea nola erraztu.

Irailean jarraituko du hortaz kanpainak bere martxa. Bitartean parte hartzaileei ere jarri zaie lana ordea… NIK75 kamixeta jantzi eta oporretarako aukeratutako leku horretan argazkia atera, ondoren Facebooken publikatu eta zabaldu munduan leloa!!

Azaroaren 8, 9, 10, 11n, Agurainen, EGIN EZAZU EUSKARAZ EDONON ETA EDONOREKIN

 

Estandarra
Sin categoría

Irten hizkuntzaren armairutik liburua eskuragai egoitzan; hartu, eraman eta gozatu!

 

Nork ez du bizi izan horrelako egoeraren bat?  Txikitatik erdaraz egin duzun lagunarekin euskaraz hitz egiten hastea ezinezkoa dela pentsatzea; denak erdaraz ari diren bileran zerbait euskaraz galdetu eta guztien begiradak zugan iltzatuta sentitzea; edo hizketan ari zaizuna aditz egokia ahoratu ezinik dabilela somatu orduko erdarara jotzea”. Denok ezta??? Ba guzti horiek eta gehiago uztartzen dira Irten hizkuntzaren armairutik liburuan. 2010ean katalanez argitaratu zen Sortir de l’armari lingüístic lanaren euskarazko egokitzapena da, EMUNek Euskal Herrian eman dituen TELP tailerretako esperientzietan oinarritua. Bi ale dauzkagu egoitzan, eta eskuragai daude zuetako edonork hartu, etxera eraman eta irakurri ahal izateko.

irten hizkuntzaren armairutikOstiral arratsaldero egoitzan edota mail bidez agurainen.euskaraz@gmail.com helbidean egin daiteke eskaera. Jada egoitzan daude; eskatu, eraman eta 10 egun izango dituzu irakurri eta berriro bueltan ekartzeko. Euskaraz bizitzeko gida bat da, nola egin aurre egunero parean jartzen zaizkigun traba txiki horiei, nola egin frente naturaltasunez eta erdarara jo gabe.

 

Azaroaren 8, 9, 10, 11n, Agurainen, EGIN EZAZU EUSKARAZ EDONON ETA EDONOREKIN

 

Estandarra
Agenda

Gaizka Garitanorekin solasaldia, BERTAN BEHERA GELDITU DA

Ekainak 9, osteguna, Agurainen programatuta zegoen Gaizka Garitanoren solasaldia BERTAN BEHERA geratu da, Garitanoren azken momentuko betebehar profesionalengatik.

Barkatu eragozpenak.

 

Garitanotasun: Jatortasun eta dotoreziaz hizkuntza eskubideen defentsa egitea. Hemen eta han. Horrela zabaldu da mugikorrez mugidor Gaizka Garitanok egunero bai bere lanean eta baita bere bizitzan ere aurrera eramaten duena. Euskaltzale amorratua izanik Eibar futbol taldeko entrenatzailea zelarik Almeriako prentsa aretoan gertaturikoa gogoan dugu denok, baina hortik haratago da euskaltzale Gaizka.

 

Bere hizkuntza hautua futbolean, egunerokoan, kalean, zailtasunak, erraztasunak… guztiak komentatu ahal izango dira berarekin izango dugun solasaldian. .

2016-06-09 gaizka garitano SOLASALDIAOstegun honetan, hilaren 9an arratsaldeko 19.00etan Zabalarte etxean. Etorri eta gozatu.

Azaroaren 8, 9, 10, 11n, Agurainen, EGIN EZAZU EUSKARAZ EDONON ETA EDONOREKIN

Estandarra
Agenda

Euskaraz eroso sentitzeko teknikak EUSKAHALDUN tailerrean

Joan zen ostegunean, hilaren 26an, Euskahaldun tailerra ospatu zen Aguraingo Zabalarte etxean. Euskaraz edonon eta edozeinekin eroso sentitzeko teknikak ikasi nahian, 30 lagun gerturatu ziren aretora eta arreta handiz jarraitu zituzten Mikel Urdangarinek emaniko aholkuak.

2016-05-26 euskahaldu tailerra 2

Ez ziren gutxi izan eman zituen jarraibideak… Hainbat eta hainbat aldiz kanpaina honetan entzun ditugun eta oraindik ere entzungo ditugun bi hitz erabili zituen berak ere: AHALDUNTZEA eta AKTIBATZEA. Bertaratu zirenei ohartarazi zien ahalduntzeko eta aktibatzeko erabakia egun batetik bestera bat batean har daitekeeen erabakia dela, baina hori lortzeko prozesua ez dela hain momentukoa, egunez egun egiten den prozesu lasai bat baizik.

 

Garrantzitsuena norberak sinestea da, norberak ahal duela pentsatzea, orduan hasiko gara ahaldun sentitzen. Egoera ezberdinetan norberaren jokatzeko modua horren araberakoa izango da, ahaldun izatearen edo ez izatearen sinismen mailaren araberakoa.

 

Arratsaldea ez zen teoria hutsean oinarritu, rol jokoen bidez eguneroko bizitzan ematen diren egoera anitz landu zituzten ikasle finek. Euskaraz eroso sentitzeko teknika horiek nola praktikan jarri, nola erakarri jendea euskaraz hitz egitera eta nola motibatu norberaren jarrerarekin inguruko jendea.

2016-05-26 euskahaldu tailerra 1

Bakoitzak badaki zein den euskaraz hitz egitearen eta euskaraz bizitzearen aldeko apustua zergatik egin duen. Partaide adina arrazoi izan ditzake kanpaina honek, eta euskahaldun adina arrazoi egon daitezke Euskal Herrian. Baina ez dago mailaketarik arlo honetan, arrazoi guztiak dira garrantzitsuak, pertsona euskaraz bizitzera eraman duen edozein arrazoi da garrantzitsua eta ona.

 

Ikasitakoa praktikan jartzea baino ez da falta. Erabakia hartua dago, eta prozesua hasi baino ez da egin….

 

Azaroaren 8, 9, 10, 11n, Agurainen, EGIN EZAZU EUSKARAZ EDONON ETA EDONOREKIN

 

 

Estandarra
Agenda

EUSKAHALDUN tailerra ostegun honetan, euskaraz edozeinekin edonon aritzeko teknikak

Agurainen euskaraz bizitzeko kanpaina aurrera doa etenik gabe. Jada 126 dira azaroaren hasierako lau egunetan euskaraz bizitzeko konpromezua hartu dutenak, euskara Aguraingo edozein eremutara edozein momentutan eramateko konpromezua hartu dutenak.

 

Horrek hainbat buruhauste ere sortu dizkio bati baino gehiagori; “gai izango ote naiz? Elkarrizketa bat euskaraz egin nahi eta erdaraz ez bukatzen ikasiko ote dut? Zergatik gertatzen dira horrelakoak? Eta nola konpondu?”

 

Galdera guzti horiei erantzun bat eman nahian EUSKAHALDUN tailerra antolatu da Agurainen ostegun honetan bertan, hilaren 26an, Zabalarte etxean arratsaldeko 18.30tan. AHIZE hizkuntza aholkularitza zentroaren eskutik, Mikel Urdangarin gidari delarik euskaraz nonahi eta noiznahi eroso sentitzeko teknikak ikasteko tailerra izango da. Ez hori bakarrik, inguruan nola eragin ere landuko da, “batek euskaraz egiten badu, ingurukoek ere egingo dute”.

 

Antolakuntzatik bi ideia behin eta berriro errepikatu dira kanpaina hasieratik: Agurain AKTIBATU egin behar dela alde batetik, eta Aguraindarrak AHALDUNDU egin behar direla bestetik. Bigarren honi ekingo zaio ostegun honetan. Euskaraz edonon eta edonorekin hitz egitea posible dela sinisten den momentuan sentituko dira Aguraindarrak AHALDUN, eta momentu horretan hasiko da herria AKTIBATZEN.

Konfidantza izan behar da norberarengan, sinismena, ausardia. Jabetza poterea da, eta potere horrek dakar ahalmena.

 

Kontzeptu horiek landuz aguraindarrengan konfidantza piztea eta posible dela sinistu araztea izango da azken finean ostegun honetan bertan antolatu den EUSKAHALDUN tailerraren helburua.

 

Azaroaren 8, 9, 10, 11n, Agurainen, EGIN EZAZU EUSKARAZ EDONON ETA EDONOREKIN

 

Estandarra
Agenda

Egoitzaren lehen eguna, aparta!

Giro ederrean ireki zituen lehen aldiz ateak Aguraingo 75 ordu euskaraz ekimenerako atondutako egoitzak. Eguraldia lagun, umoretsu eta alai zebiltzan Aguraindarrak ostiral arratsaldean, eta halaxe joan zen arratsa egoitzan ere.

Egoitzaren inaugurazioa (5)19.30ak aldera ateak zabaldu eta lan eta lan arduradunak: batek ardoa banatu, besteak pintxoak, “hemen borondatea!”, kamisetak, norbanakoen konpromezuak… aspertzeko astirik ez.

Egoitzaren inaugurazioa (4)Jeiki dantza taldeak eta Jotafa euskaldunon txarangak dantza poteoa zuten egun horretarako antolatua. Eta geldialdietako bat… egoitza berrian! Horiek bai martxa! Musika, dantza, umorea, bizipoza eta konpromezua, euskararekiko konpromezua. Horiek denak kokteleran sartu eta giro aparta sortu zen egoitzako atarian. Eta inaugurazio borobila izateko… Dantzariek agurra dantzatu zuten atarian. Biba zuek!

Egoitzaren inaugurazioa (1)Aipatu bezala, ekimena egunero eta edozein lekutan ikusi dadin, kamisetak eskatzeko aukera ere egon zen. Ostirala izan zen eskatu ahal izateko lehen eguna, berdea edo beltza, zein baina zein politagoak. Datorren ostiralean ere egongo da horretarako aukera. 60 salduta daude jada, argi ibili zuena eskuratzeko!

Egoitzaren inaugurazioa (2)Norbanakoen konpromezuen pila ere pixkanaka pixkana handituz doa. Ostiralean 25 pertsonak eman zioten baiezkoa euskaraz bizitzeko konpromezuari. 200 norbanako lortzea da antolakuntzaren helburua, gero eta gertuago dagoen helburua.

Egoitzaren inaugurazioa (3)Kontuak kontu, primerako arratsaldea: konpromezuen pila geroz eta handiagoa, inskripzio orri hutsena geroz eta txikiagoa, bete beterik eramandako pintxo bandejak hutsik bueltatu ziren etxera, eta euskaraz edozein lekutan eta edonorekin euskaraz aritzeko ilusioa sendoagoa dudarik gabe. Hau hasi besterik ez da egin!

Azaroaren 8, 9, 10, 11n, Agurainen, EGIN EZAZU EUSKARAZ EDONON ETA EDONOREKIN

Estandarra
Agenda

Egoitzaren inaugurazioa!!! Gonbidatuta zaude!!!

75 OE - Egoitza

Ostiral honetan, hilaren 20an, 75 ordu Euskaraz mugimendurako lortutako lokalaren inaugurazioa izango da. Aguraingo erdigunean, Kale Nagusian bertan izango du elkargune ekimenak. Ostiralero zabalik egongo da euskaltzale guztion topagune izatera iritsi nahi duelarik.

Idatzi honen bidez euskaltzale guztiak gonbidatuta daudela jakinarazten da!!

19.30etatik aurrera, ohitura onei muzin egin ezinik, pintxo potea egongo da, eta ekimenerako espreski diseinatutako kamisetak enkargatzeko aukera ere bai.

NIK75 kamiseta

Azarora begira 200 norbanakok euskara eguneroko esparru guztietara zabaltzeko konpromezua hartzea da helburu, euskaraz bizitzeko gogoa adieraztea. Hori lortu nahian zabalduko ditu ateak ostiralero egoitzak.

Azaroaren 8, 9, 10, 11n, Agurainen, EGIN EZAZU EUSKARAZ EDONON ETA EDONOREKIN

Estandarra
Agenda

Euskara hutsean bizi, baita Agurainen ere

Agurainen lau egunetan zehar euskara hutsean aritzea eta euskara esparru guztietara hel araztea helburu harturik, hilaren 10ean aurkeztu zen jendaurrean 75 ORDU EUSKARAZ Agurainen egitasmoa.

2016-05-10 agurain 75 ordu euskaraz prentsaurrekoa 2

Ez da festa bat izango, ezta jardueraz beteriko eguna ere; lau egunez, egunerokoan, Agurainen euskaraz bizi ahal izateko ekimena baizik. Horrela eman zen jakitera aurkezpen ekitaldian eta horrela eramango da aurrera antolakuntzatik. “Lehen hitza, bigarrena eta baita hirugarrena ere euskaraz egitea da helburu”.

200 norbanako eta 150 kolektibo bildu nahi ditu ekimenak denda eta bestelako enpresaren parte hartzea lortuz. Eguna iritsi arte herria aktibatu, prestatu eta ahaldunduko da ekintzak eta ikastaroak antolatuz; “edonon eta edonorekin euskaraz eroso sentitzen ikasteko”.

Euskaraz bizitzeko hautua egin duen aguraindar talde bat dago honen atzean. Herrian euskararen erabilera bultzatzea da helburu; herritarren %50 inguru euskalduna edo ia euskalduna izan arren, oso baxua baita euskararen erabilera.

2016-05-10 agurain 75 ordu euskaraz prentsaurrekoa 4

Azaroaren 8, 9, 10, 11n, Agurainen, EGIN EZAZU EUSKARAZ EDONON ETA EDONOREKIN

 

PRENTSA IDATZIAN AGERTUTAKO ARTIKULUAK

ALEA

2016-05-11 prentsaurrekoa ALEA

BERRIA

2016-05-11 prentsaurrekoa BERRIA

GARA

2016-05-11 prentsaurrekoa GARA

DIARIO DE NOTICIAS

2016-05-11 prentsaurrekoa NOTICIAS

EL CORREO

2016-05-11 prentsaurrekoa ELCORREO 2

Estandarra
Agenda

75 ORDU EUSKARAZ – Aurkezpen prentsaurrekoa

Maiatzaren 10ean, asteartean, Agurainen 75 ORDU EUSKARAZ kanpainaren aurkezpen prentsaurrekoa

2016-03-02 egitura 75ordueuskaraz logoekin

Etenik gabe doa aurrera Agurain euskalduntzeko hainbat herritarrek martxan jarritako ekimena. Datorren asteartean, hilaren 10ean, prentsaurrekoa eskeiniko da medioen aurrean egitasmoa ezagutzera emateko. Asteroko azokarekin bat eginez, goizeko 11.30tan izango da San Juan enparantzan.

 

Donostiako Egiako auzokideen esperientzia ezagutzea izan zen aurreneko pausua; haiekin positibotasunez barrua ondo bete, hainbat bilera ondoren, eta ostiralean kalera irten ziren gainontzeko aguraindarrei egitasmoaren berri emateko asmoz. Ugariak izan ziren lehen egunean jasoriko atxikimenak eta konpromezuak, baina hau hasi besterik ez da egin…

 

Azaroaren 8, 9, 10, 11n, Agurainen, EGIN EZAZU EUSKARAZ EDONON ETA EDONOREKIN

Estandarra
Agenda

AGURAINEN 75 ORDU EUSKARAZ herriko kaleetara atera dugu

 

Maiatzaren 6an, ostiraleko poteoarekin  batera AGURAINEN 75 ORDU EUSKARAZ zer den azaldu diegu aguraindarrei. Esperientzia berria da hau eta ondo azaltzeko asmoz hiru informazio gune ipini genituen. Herritarrak hurbildu dira, zer den eta nola parte har dezaketen azaldu diegu.

Agurain Euskaraz NIK75 mahaiak 2
Egitasmo honek euskaldunak aktibatzea du helburu. Azaroaren 8, 9, 10 eta 11n euskaraz bizitzea proposatzen dugu, edonon eta edonorekin, egunerokoan. Horretarako euskaldunen jokabide aktiboa beharrezkoa da. Lau egun horietan parte hartzaileak lotzeko asmoz NIK75 kanpaina martxan ipini dugu. Horretarako prest dagoen euskaldunak adierazpen bat sinatzen du. Ostiralean lehenengo NIK75 parte hartzaileek sinatu zuten, erabakia hartu zuten. Norbanakoen hautuan oinarritzen da 75 ORDU EUSKARAZ, baina izaera kolektiboa du proposamen berri honek, eta horrek emango dizkigu ziurtasuna eta babesa.

Agurain euskaraz NIK75 mahaiak 3
NIK75 parte hartzaile guztion jokabide aktiboaren bitartez euskara erabiltzeko eta ezagutzeko gogoa indartu nahi dugu.

Azaroaren 8, 9, 10, 11n, Agurainen, EGIN EZAZU EUSKARAZ EDONON ETA EDONOREKIN.

Estandarra